હાય રે મોંઘવારી! 10 લાખનું એક ટમેટું તો 10 હજારમાં સિલિન્ડર

પાકિસ્તાનમાં દૂધના ભાવ આસમાને પહોંચ્યા
શ્રીલંકામાં શાકભાજીની કિંમતોએ લોકોને રડાવ્યા
વેનેઝુએલા,સુદાન અને સીરિયામાં મોંઘવારીનો માર

કોરોના મહામારી અને ખોટી આર્થિક નીતિઓને કારણે કેટલાક દેશો વિનાશની આરે પહોંચી ગયા છે. આપણા પાડોશી દેશો પાકિસ્તાન અને શ્રીલંકા પણ આમાથી બાકાત નથી. કેટલાક દેશમાં સિલિન્ડરની કિંમત 10,000 રૂપિયાની નજીક પહોંચી ગઈ છે તો કેટલાક દેશમાં મરચાની કિંમત 710 રૂપિયા સુધી પહોંચી ગઈ છે. આવો જાણીએ વિશ્વના કયા દેશો ઊંચા મોંઘવારીથી સૌથી વધુ પરેશાન છે.

પાકિસ્તાનના પીએમની ઉંઘ હરામ

પાકિસ્તાનમાં એલપીજીના ભાવથી લોકો પરેશાન છે. દેશમાં ઘરેલુ સિલિન્ડરની કિંમત 2,560 રૂપિયા પર પહોંચી ગઈ છે. તો બીજી તરફ, કોમર્શિયલ સિલિન્ડરની કિંમત 9,847 રૂપિયા છે. એક રિપોર્ટમાં કહેવામાં આવ્યું છે કે પાકિસ્તાનમાં દૂધની કિંમત 150 રૂપિયા પ્રતિ લીટર સુધી પહોંચી ગઈ છે. પાકિસ્તાનમાં ખાંડના ભાવ 100 રૂપિયા પ્રતિ કિલોએ પહોંચી ગયા છે. બીજી તરફ ઘઉંની કિંમત 40 રૂપિયા પ્રતિ કિલોથી વધીને 70 રૂપિયા પ્રતિ કિલો થઈ ગઈ છે. એટલું જ નહીં મટન, ચિકન, કઠોળ અને અન્ય વસ્તુઓના ભાવ પણ આસમાને પહોંચ્યા છે.

કોરોનાએ શ્રીલંકાની કમર તોડી નાખી

કોરોનાના કારણે શ્રીલંકાની અર્થવ્યવસ્થા પર ખરાબ અસર પડી છે. દેશમાં મોંઘવારી ચરમસીમાએ પહોંચી ગઈ છે અને ખાદ્યપદાર્થોના ભાવ આસમાને છે. વિશ્વ બેંકનો અંદાજ છે કે રોગચાળો શરૂ થયો ત્યારથી અત્યાર સુધીમાં પાંચ લાખ લોકો ગરીબી રેખા નીચે આવી ગયા છે. અહેવાલો અનુસાર, નવેમ્બર 2021થી ડિસેમ્બર 2021 વચ્ચે શ્રીલંકામાં ખાદ્ય પદાર્થોની મોંઘવારી 15 ટકા વધી છે. તેનું મુખ્ય કારણ શાકભાજીના ભાવમાં વધારો છે.

શ્રીલંકામાં 100 ગ્રામ મરચાંની કિંમત 18 રૂપિયા (શ્રીલંકાઈ)થી વધીને 710 રૂપિયા (શ્રીલંકાઈ) થઈ ગઈ છે. એટલું જ નહીં દેશમાં એક કિલો બટાકાની કિંમત 200 રૂપિયા સુધી પહોંચી ગઈ છે. શ્રીલંકામાં રીંગણની કિંમત 160 રૂપિયા પ્રતિ કિલો, ભીંડા 200 રૂપિયા પ્રતિ કિલો અને ગાજરની કિંમત 200 રૂપિયા પ્રતિ કિલો પર પહોંચી ગઈ છે.

વેનેઝુએલામાં પણ ખરાબ સ્થિતિ

દક્ષિણ અમેરિકન દેશ વેનેઝુએલામાં 2021માં વાર્ષિક ફુગાવાનો દર 686.4 ટકા રહ્યો હતો. 2020માં દેશમાં મોંઘવારીનો દર 2,959.8 ટકા પર પહોંચી ગયો હતો. જેના કારણે ખાદ્યપદાર્થો ખૂબ મોંઘા થઈ ગયા અને લોકો તેની સામે રસ્તા પર આવી ગયા. 2019માં દેશમાં 5 ટામેટાંની કિંમત 50 લાખ બોલિવર (વેનેઝુએલાની ચલણ) પર પહોંચી ગઈ હતી.

સીરિયામાં પણ મોંઘવારીએ લોકોને પરેશાન કર્યા

સીરિયામાં ઈંધણના ભાવમાં તીવ્ર વધારાને કારણે શાકભાજી અને ફળોના ભાવમાં 15 ટકાથી વધુનો વધારો થયો છે. દેશમાં સબસિડી વિનાનું ડીઝલ 1700 સીરિયન પાઉન્ડ પર પહોંચી ગયું છે. એ જ રીતે, સબસિડી વિનાના 90 ઓક્ટેન ગેસોલિનની કિંમત વધીને 2500 સીરિયન પાઉન્ડ થઈ ગઈ છે. દેશમાં મોંઘવારીની સ્થિતિ એવી બની છે કે ગયા વર્ષે સીરિયાએ પાંચ હજાર સીરિયન પાઉન્ડની નોટ બહાર પાડી હતી. તેવી જ રીતે આફ્રિકન દેશ સુદાનમાં મોંઘવારી તેની ટોચ પર છે. દેશમાં ખાંડ અને ઘઉંના ભાવમાં નોંધપાત્ર વધારો થયો છે. આ ઉપરાંત યમન અને સીરિયામાં ખાદ્યપદાર્થો ખૂબ મોંઘા થઈ ગયા છે.