જયશંકર યુએનમાં બોલ્યા- દુનિયા પાકિસ્તાનને આતંકવાદના એપીસેન્ટર તરીકે જુએ છે

• સમગ્ર વિશ્વ આજે તેમને આતંકવાદના કેન્દ્ર તરીકે જુએ છે: જયશંકર
• જયશંકર પાકિસ્તાનના વિદેશ રાજ્યમંત્રી હિના રબ્બાની ખારના આરોપનો આપ્યો જવાબ
• જયશંકરે સંયુક્ત રાષ્ટ્ર સુરક્ષા પરિષદના અસ્થાયી સભ્યપદ પર કરી ખાસ વાત

વિદેશ મંત્રી એસ. જયશંકરે ગુરુવારે કહ્યું કે વિશ્વ પાકિસ્તાનને આતંકવાદના 'કેન્દ્ર' તરીકે જુએ છે. તેમણે ભારપૂર્વક જણાવ્યું હતું કે કોવિડ-19 મહામારીના બે વર્ષનો સમયગાળો હોવા છતાં વૈશ્વિક સમુદાય એ ભૂલી શક્યું નથી કે આતંકવાદની આ દુષ્ટતાનું મૂળ ક્યાં છે.

'UNSC બ્રીફિંગઃ ગ્લોબલ કાઉન્ટર ટેરરિઝમ એપ્રોચઃ ચેલેન્જ એન્ડ વે ફોરવર્ડ'ની અધ્યક્ષતા કર્યા પછી જયશંકરે સંયુક્ત રાષ્ટ્ર સુરક્ષા પરિષદમાં પત્રકારો સાથેની વાતચીત દરમિયાન ઉપરોક્ત ટિપ્પણી કરી હતી. વિદેશ મંત્રીએ કહ્યું, "તેઓ ગમે તે કહેતા હોય, હકીકત એ છે કે દરેક લોકો, સમગ્ર વિશ્વ આજે તેમને આતંકવાદના કેન્દ્ર તરીકે જુએ છે."

આતંકવાદ ક્યાંથી શરૂ થાય છે તે દુનિયા ભૂલશે નહીં...

જયશંકરે કહ્યું, “હું જાણું છું કે અમે અઢી વર્ષથી કોવિડ સામે લડી રહ્યા છીએ અને તેના કારણે યાદો થોડી ધૂંધળી થઈ ગઈ છે, પરંતુ હું તમને ખાતરી આપું છું કે દુનિયા એ નથી ભૂલ્યું કે આતંકવાદની શરૂઆત ક્યાંથી થાય છે અને ક્ષેત્ર બહાર તમામ ગતિવિધિઓ પર કોની છાપ દેખાય છે.

જયશંકરે કહ્યું, "આથી હું કહીશ કે કોઈપણ પ્રકારની કલ્પનામાં જીવતા પહેલા તેમણે પોતાને એ વાત યાદ કરાવવી જોઈએ." જયશંકર પાકિસ્તાનના વિદેશ રાજ્યમંત્રી હિના રબ્બાની ખારના તાજેતરના આરોપ પર પૂછવામાં આવેલા પ્રશ્નોના જવાબ આપી રહ્યા હતા. ખારે આરોપ લગાવ્યો હતો કે "ભારત કરતા વધુ સારી રીતે અન્ય કોઈ દેશે આતંકવાદનો ઉપયોગ કર્યો નથી."

એસ જયશંકરે સંયુક્ત રાષ્ટ્ર સુરક્ષા પરિષદના અસ્થાયી સભ્યપદ પર કહ્યું.

વિદેશ મંત્રી એસ. જયશંકરે 2028-29માં સંયુક્ત રાષ્ટ્ર સુરક્ષા પરિષદના અસ્થાયી સભ્યપદ માટે ભારતની ઉમેદવારીની જાહેરાત કરી છે. ભારતને ડિસેમ્બર 2022 માટે સંયુક્ત રાષ્ટ્ર સુરક્ષા પરિષદનું પ્રમુખપદ મળ્યું છે, જે દર મહિને બદલાય છે. ભારતની પાસે 31 ડિસેમ્બર સુધી આ અધ્યક્ષતા રહેશે. ભારતને સંયુક્ત રાષ્ટ્ર સુરક્ષા પરિષદના ચૂંટાયેલા સભ્ય તરીકે બે વર્ષની મુદતમાં ઓગસ્ટ 2021થી બીજી વખત કાઉન્સિલનું માસિક પ્રમુખપદ મળ્યું છે.

જયશંકરે કહ્યું, "મને તમને જણાવતા આનંદ થાય છે કે અમે 2028-29 માટે સુરક્ષા પરિષદ માટે અમારી ઉમેદવારી જાહેર કરી છે." કાઉન્સિલમાં ભારતનો 2021-22નો કાર્યકાળ 31 ડિસેમ્બરે સમાપ્ત થાય છે. સુરક્ષા પરિષદમાં તાત્કાલિક સુધારાની હાકલ કરનારા દેશોમાં ભારત મોખરે રહ્યું છે.