દુઃખદ:'બિગ બોસ' ફૅમ સિદ્ધાર્થ શુક્લાનું 40ની ઉંમરમાં હાર્ટ અટેકને કારણે અવસાન

સિદ્ધાર્થ શુક્લાને મુંબઈની કૂપર હોસ્પિટલમાં એડમિટ કરવામાં આવ્યો હતો.

40 વર્ષીય ટીવી એક્ટર સિદ્ધાર્થ શુક્લાનું આજે (2 સપ્ટેમ્બર)ના રોજ હાર્ટ અટેકને કારણે અવસાન થયું છે. ઉલ્લેખનીય છે કે સિદ્ધાર્થ શુક્લા 'બિગ બોસ 13'ને કારણે લોકપ્રિય થયો હતો. સિદ્ધાર્થને મુંબઈની કૂપર હોસ્પિટલમાં એડમિટ કરવામાં આવ્યો હતો. જોકે, ડૉક્ટર્સ તેને બચાવી શક્યા નહીં.

રાત્રે સૂતા પહેલાં દવાઓ લીધી હતી
સૂત્રોના જણાવ્યા પ્રમાણે, સિદ્ધાર્થે રાત્રે (બુધવાર, 1 સપ્ટેમ્બર) કેટલીક દવાઓ લીધી હતી, પરંતુ ત્યારબાદ તે ઉઠ્યો નહીં. હોસ્પિટલે પછી પુષ્ટિ કરી હતી કે સિદ્ધાર્થનું મોત હાર્ટ અટેકને કારણે થયું છે.

ટીવી ઇન્ડસ્ટ્રીનું મોટું નામ
સિદ્ધાર્થ શુક્લા ટીવી ઇન્ડસ્ટ્રીનું મોટું નામ છે. તેણે 'બિગ બોસ 13'ની સિઝન જીતી હતી. આ ઉપરાંત તેણે 'ખતરો કે ખિલાડી 7' શો જીત્યો હતો. સીરિયલ 'બાલિકા વધૂ'ને કારણે સિદ્ધાર્થ ઘેર-ઘેર લોકપ્રિય થયો હતો.

'બિગ બોસ' જીત્યા બાદ મ્યૂઝિક વીડિયોમાં જોવા મળ્યો હતો
શો જીત્યા પછી સિદ્ધાર્થ દર્શન રાવલના મ્યૂઝિક વીડિયો ‘ભૂલા દુંગા’માં શહનાઝ ગિલ સાથે દેખાયો હતો. એ પછી બીજા સોંગ ‘દિલ કો કરાર આયા’માં તેની ઓપોઝિટ નેહા શર્મા દેખાઈ હતી.

મુંબઈમાં જન્મ
સિદ્ધાર્થનો 12 ડિસેમ્બર, 1980ના રોજ મુંબઈમાં જન્મ થયો હતો. તેણે પોતાની કરિયરની શરૂઆત મોડલ તરીકે કરી હતી. 2008માં તેણે 'બાબુલ કા અંગના છૂટે ના'થી ટીવી ડેબ્યૂ કર્યું હતું. ત્યારબાદ તેણે વિવિધ સિરિયલમાં કામ કર્યું હતું.

'બિગ બોસ' જીત્યા બાદ સિદ્ધાર્થ માતા સાથે

ફિલ્મમાં પણ જોવા મળ્યો
સિદ્ધાર્થ શુક્લા 2014માં ફિલ્મ 'હમ્પ્ટી શર્મા કી દુલ્હનિયા'માં જોવા મળ્યો હતો. ત્યારબાદ તેણે 'બિઝનેસ કી કઝખસ્તાન'માં પમ કામ કર્યું હતું. વેબ સિરીઝ 'બ્રોકન બટ બ્યૂટીફૂલ 3'માં પણ જોવા મળ્યો હતો.

ટીવી ઇન્ડસ્ટ્રી શોકમાં
સિદ્ધાર્થ શુક્લાના આકસ્મિક મોતથી ટીવી ઇન્ડસ્ટ્રી ઘેરા આઘાતમાં છે. 'બિગ બોસ 13'ના પૂર્વ સ્પર્ધક અબુ મલિકે કહ્યું હતું, 'મેં બે દિવસ પહેલાં જ તેની સાથે વાત કરી હતી. તે મારા એક વીડિયોમાં કામ કરવાનો હતો. તેણે મને કહ્યું હતું કે તે આ વીડિયોમાં કામ કરશે. મને હજી વિશ્વાસ થતો નથી કે તે હવે નથી. મને આ સાંભળીને ઘેરો આઘાત લાગ્યો છે.'

'બિગ બોસ 13'ના ઘરમાં દેવોલિના

'બિગ બોસ 13'ની સ્પર્ધક તથા ટીવી એક્ટ્રેસ દેવોલિના ભટ્ટાચાર્યે કહ્યું હતું, 'આ વાત સાચી છે કે સિદ્ધાર્થ આપણને છોડીને જતો રહ્યો. હું હવે ક્યારેય પહેલાંની જેમ નહીં રહી શકું. આ ઘણું જ આઘાતજનક છે. અત્યારે મારી વિશે કોઈ જ શબ્દો નથી.'