KKના માથા અને મોં પર ઇજાના નિશાન, મોત મામલે પોલીસ કેસ નોંધાયો

• મૃત્યુનું સાચું કારણ પોસ્ટમોર્ટમ બાદ જ સામે આવશે
• એક ઇજા કપાળ પર અને બીજી મોંની આસપાસ
• કેકેનો પરિવાર મુંબઈથી કોલકત્તા પહોંચશે

બોલિવુડના પ્રખ્યાત ગાયક કેકેનું મંગળવારે મોડી રાત્રે કોલકત્તામાં એક સ્ટેજ શો દરમિયાન હાર્ટએટેક આવતા મૃત્યુ થયું હતું. હવે એવા અહેવાલ મળ્યા છે કે કેકેના માથા પર ઈજાના નિશાન મળી આવ્યા છે ત્યારબાદ કોલકત્તા પોલીસે આ મામલે કેસ નોંધ્યો છે. જણાવવામાં આવી રહ્યું છે કે કેકેના માથા અને ચહેરા પર ઈજાના નિશાન જોવા મળ્યા છે. જોકે, મૃત્યુનું સાચું કારણ પોસ્ટમોર્ટમ બાદ જ સામે આવશે.

માથા અને મોં પાસે ઇજાના નિશાન

સૂત્રોનું કહેવું છે કે કેકેને બે ઈજાઓ થઈ છે. એક ઈજા તેના કપાળ પર અને બીજી તેના મોઢાની આસપાસ છે. ઇજાઓ વિશે વધુ વિગતો પોસ્ટમોર્ટમ પછી ઉપલબ્ધ થશે. આ સાથે તબીબોનું કહેવું છે કે મૃત્યુનું સાચું કારણ પોસ્ટમોર્ટમ બાદ જ બહાર આવશે.

કોલકત્તા પોલીસે કેસ નોંધ્યો

ગાયક કેકેના મૃત્યુ બાદ કોલકત્તાના ન્યુ માર્કેટ પોલીસ સ્ટેશનમાં અકુદરતી મૃત્યુનો કેસ નોંધવામાં આવ્યો છે. પોલીસ એ પણ તપાસ કરી રહી છે કે શું ઓડિટોરિયમમાં લોકોની સંખ્યા મર્યાદા કરતાં વધુ છે. એસી કામ કરતું હતું કે નહીં. આ ઉપરાંત પોલીસ આવી પરિસ્થિતિની પણ તપાસ કરી રહી છે, જેના કારણે પ્રદર્શન દરમિયાન કેકે બીમાર પડ્યા હતા.

બપોરે 12 વાગ્યે મૃતદેહને પોસ્ટમોર્ટમ માટે લઈ જવામાં આવશે

સિંગર કેકેના નશ્વર દેહને ખાનગી હોસ્પિટલમાંથી બપોરે 12 વાગ્યે SSKM હોસ્પિટલમાં લઈ જવામાં આવશે, જ્યાં પોસ્ટમોર્ટમ કરવામાં આવશે. પોસ્ટમોર્ટમ બાદ કે.કે.ના માથા અને મોં પર થયેલી ઈજાઓ વિશે વધુ માહિતી મળી શકશે.

કેકેનો પરિવાર મુંબઈથી કોલકત્તા પહોંચશે

ગાયક કેકેના પરિવારમાં તેમની પત્ની અને બે પુત્રો છે. કેકેના મૃત્યુ બાદ તેનો પરિવાર મુંબઈથી કોલકત્તા પહોંચી રહ્યો છે. તેમની પત્ની અને પુત્ર સવારે 9 વાગ્યાની આસપાસ કોલકત્તા પહોંચે તેવી શકયતા વ્યકત કરાઇ હતી.