સુપરસ્ટાર અજિત કુમારની ‘વાલીમાઈ’એ રિલીઝ પહેલા જ બનાવ્યો આ રેકોર્ડ

વાલીમાઈ ફિલ્મે બોક્સ ઓફિસ પર તોડ્યો રેકોર્ડ
અજિત કુમારે બનાવેલો જ રેકોર્ડ આ ફિલ્મે તોડી દીધો
ફિલ્મના થિયેટ્રિકલ રાઇટ્સ વૈશ્વિક સ્તરે 96 કરોડ રૂપિયામાં વેચાયા

સાઉથની ફિલ્મોના સુપરસ્ટાર અજિત કુમાર (Ajith Kumar) ટૂંક સમયમાં ફિલ્મ ‘વાલીમાઈ’ (Valimai)માં જોવા મળશે. આ ફિલ્મમાં અજિત કુમારની શાનદાર એક્ટિંગની સાથે એક્શન અને થ્રિલર પણ ભરપૂર પ્રમાણમાં જોવા મળશે. દર્શકો પણ ઘણા સમયથી અજીત કુમારની આ ફિલ્મની રાહ જોઈ રહ્યા છે. પરંતુ ખાસ વાત એ છે કે હવે આ રાહનો અંત થવા જઈ રહ્યો છે. અજિત કુમારની ફિલ્મ ‘વાલીમાઈ’ એ રિલીઝ પહેલા જ ધમાલ મચાવી દીધી છે. આ ફિલ્મે બોક્સ ઓફિસ પર અજિત કુમારે બનાવેલો રેકોર્ડ તોડ્યો છે.

ફિલ્મ થિયેટ્રિકલ રાઇટ્સ વૈશ્વિક સ્તરે કુલ 96 કરોડ રૂપિયામાં વેચાયા

હકીકતમાં અજિત કુમારની ફિલ્મ ‘વાલીમાઈ’ના થિયેટ્રિકલ રાઇટ્સ વૈશ્વિક સ્તરે કુલ 96 કરોડ રૂપિયામાં વેચાયા છે. આવી સ્થિતિમાં ફિલ્મે તેની રિલીઝ પહેલા જ વૈશ્વિક સ્તરે 96 કરોડ રૂપિયાનો બિઝનેસ કરી લીધો છે. આ આંકડા સાથે અજિત કુમારની ‘વાલીમાઈ’એ તેમની 2017ની ફિલ્મ ‘વિવેગમ’નો રેકોર્ડ તોડી નાખ્યો છે જેણે 85 કરોડ રૂપિયામાં થિયેટ્રિકલ રાઇટ્સ વેચ્યા હતા.

રિલીઝ પહેલા જ ફિલ્મે લગભગ રૂ. 96 કરોડની કમાણી કરી

અજિત કુમારના વાલીમાઈના થિયેટર રાઈટ્સ તમિલનાડુમાં રૂ. 64.50 કરોડ, આંધ્રપ્રદેશ/તેલંગાણામાં રૂ. 2.50 કરોડ, કર્ણાટકમાં રૂ. 4 કરોડ, કેરળમાં રૂ. 2.50 કરોડ અને ઉત્તર ભારતમાં રૂ. 2.50 કરોડમાં વેચાયા હતા. ફિલ્મના થિયેટ્રિકલ રાઇટ્સ વિદેશમાં કુલ રૂ. 20 કરોડમાં વેચાયા છે, તેથી ફિલ્મે તેની રિલીઝ પહેલા જ લગભગ રૂ. 96 કરોડની કમાણી કરી લીધી છે.

ફિલ્મ રિલીઝ પહેલા જ 155 કરોડ રૂપિયાનો બિઝનેસ કરી શકે છે

મીડિયા રિપોર્ટ્સ અનુસાર અજિત કુમારની ફિલ્મ વાલીમાઈ થિયેટ્રિકલ રાઇટ્સ સિવાય સેટેલાઇટ, ડિજિટલ પ્લેટફોર્મ અને મ્યુઝિક દ્વારા લગભગ 60 કરોડ રૂપિયા વધુ કમાણી કરી શકે છે. તેના દ્વારા અજીત કુમારની ફિલ્મ રિલીઝ પહેલા જ 155 કરોડ રૂપિયાનો બિઝનેસ કરી શકે છે. તમને જણાવી દઈએ કે ‘વાલીમાઈ’ પહેલા પોંગલ પર રિલીઝ થવાની હતી. પરંતુ ઓમિક્રોનના વધતા જતા કેસોને કારણે ફિલ્મની રિલીઝમાં મોડું થયું.