IND Vs SA: ફાઈનલના 3 મોટા ટર્નિંગ પોઈન્ટ, જેણે હારેલી મેચ જીતાડી

• સાઉથ આફ્રિકાને હરાવીને ટીમ ઈન્ડિયા બની ચેમ્પિયન
• ટીમ ઈન્ડિયાએ ફાઈનલ મેચ 7 રને જીતી લીધી હતી
• હાર્દિક પંડ્યાની 17મી ઓવર બની ટર્નિંગ પોઈન્ટ

T20 વર્લ્ડકપ 2024ની ફાઈનલ મેચ ભારત અને સાઉથ આફ્રિકા વચ્ચે રમાઈ હતી. આ રોમાંચક મેચ જીતીને ટીમ ઈન્ડિયાએ ICC ટ્રોફીના 11 વર્ષના દુષ્કાળનો પણ અંત લાવી દીધો છે. રોહિત શર્માની કેપ્ટન્સીમાં ટીમ ઈન્ડિયાએ પ્રથમ વખત ICC ટ્રોફી જીતી છે. ટીમ ઈન્ડિયાએ ફાઈનલ મેચ 7 રને જીતી લીધી હતી. એક સમયે મેચ સાઉથ આફ્રિકાના હાથમાં હોય તેવું લાગી રહ્યું હતું પરંતુ મેચમાં ત્રણ ટર્નિંગ પોઈન્ટ આવ્યા જેના કારણે ટીમ ઈન્ડિયા ચેમ્પિયન બની હતી.

બુમરાહની 16 અને 18મી ઓવર

આ મેચમાં સાઉથ આફ્રિકાની બેટિંગ દરમિયાન 15મી ઓવર સુધી મેચ આફ્રિકાના પક્ષમાં રહી હતી. અક્ષર પટેલે 15મી ઓવર ફેંકી હતી જે ઘણી મોંઘી પણ હતી, આ ઓવરમાં જ સાઉથ આફ્રિકાએ વાપસી કરી હતી. આ પછી કેપ્ટન રોહિતે પોતાના સૌથી ખતરનાક બોલર બુમરાહ પર વિશ્વાસ વ્યક્ત કર્યો અને તેને 18મી ઓવર આપી. 18મી ઓવરમાં જસપ્રીત બુમરાહે પણ માત્ર 2 રન આપીને એક વિકેટ લીધી હતી. બુમરાહની આ ઓવર પછી સાઉથ આફ્રિકાની ટીમ ખૂબ જ દબાણમાં આવી ગઈ હતી.

 

 

હાર્દિકની 17મી ઓવર

આ મેચમાં હાર્દિક પંડ્યાને 17મી ઓવર આપવી એ એક મોટો ટર્નિંગ પોઈન્ટ સાબિત થયો. 17મી ઓવરમાં હાર્દિક પંડ્યાએ સાઉથ આફ્રિકાના ખતરનાક બેટ્સમેન હેનરિક ક્લાસેનની વિકેટ લઈને ટીમ ઈન્ડિયાને શાનદાર વાપસી કરાવી હતી. ક્લાસેન આ મેચમાં ખૂબ જ તોફાની ઇનિંગ્સ રમી રહ્યો હતો. આ ઓવરમાં હાર્દિકે માત્ર 4 રન આપીને મહત્વની વિકેટ લીધી હતી.

 

 

સૂર્યકુમાર યાદવનો કેચ

આ મેચનો સૌથી મોટો વળાંક ડેવિડ મિલરનો કેચ હતો, જેને બાઉન્ડ્રી લાઇન પર સૂર્યકુમાર યાદવે કેચ કર્યો હતો. આ મેચ જીતવા માટે સાઉથ આફ્રિકાને છેલ્લી ઓવરમાં 16 રનની જરૂર હતી અને સાઉથ આફ્રિકાનો ખતરનાક બેટ્સમેન ડેવિડ મિલર ક્રિઝ પર હાજર હતો.

 

 

હાર્દિક પંડ્યા પણ છેલ્લી ઓવર નાખવા આવ્યો હતો. મિલરે હાર્દિકના પહેલા જ બોલ પર મોટો શોટ રમવાનો પ્રયાસ કર્યો, એક સમયે એવું લાગતું હતું કે આ બોલ સિક્સર ફટકારશે પરંતુ બાઉન્ડ્રી પર ઉભેલા સૂર્યકુમાર યાદવે શાનદાર કેચ લઈને બધાને ચોંકાવી દીધા. અહીં ટીમ ઈન્ડિયા લગભગ મેચ જીતી ગઈ હતી.