બજરંગ દળના કાર્યકર્તાની હત્યા બાદ શિવમોગામાં ભારેલા અગ્નિ જેવી સ્થિતિ

બજરંગ દળના કાર્યકર્તાની હત્યા બાદ શિવમોગામાં ભારેલા અગ્નિ જેવી સ્થિતિ

• શિવમોગામાં સ્થિતિને કાબુમાં લેવા વધારાની ફોર્સ તૈનાત

• આ કેસમાં પોલીસે ચાર લોકોની ધરપકડ કરી છે

• શહેરમાં આગચંપી અને હિંસાની 14 ઘટનાઓ બની

કર્ણાટકમાં હિજાબ વિવાદ બાદ એક નવો મામલો સામે આવ્યો છે. કર્ણાટકના શિવમોગામાં રવિવારની રાત્રે બજરંગ દળના કાર્યકર હર્ષના મૃત્યુના સંબંધમાં મંગળવારે સવારે પણ આગચંપી અને હિંસા થઈ હતી. આ કેસમાં પોલીસે ચાર લોકોની ધરપકડ કરી છે. તેમજ 12 લોકોને પૂછપરછ માટે કસ્ટડીમાં લેવામાં આવ્યા છે.

પોલીસ સૂત્રોએ જણાવ્યું કે ધરપકડ કરાયેલા લોકોની ઓળખ કાશિફ, નદીમ, આસિફ અને રિહાન તરીકે થઈ છે, જેઓ 20 વર્ષના છે. આ લોકો વિશે માહિતી એકત્રિત કરવામાં આવી રહી છે. અધિક પોલીસ મહાનિર્દેશક સી પ્રતાપ રેડ્ડીએ જણાવ્યું હતું કે મંગળવારે સવારે તુંગાનગરમાં કેટલાક વાહનોને આગ ચાંપી દેવામાં આવી હતી. જ્યારે આ વિસ્તારમાં CrPCની કલમ 144 લાગુ છે. આમાં સામેલ તમામ આરોપીઓની ઓળખ કરી લેવામાં આવી છે અને ધરપકડ કરવામાં આવી છે. અન્ય ધરપકડો ટૂંક સમયમાં કરવામાં આવશે.

રેડ્ડીએ જણાવ્યું હતું કે હર્ષની હત્યાને લઈને શહેર અને આસપાસના કેટલાક વિસ્તારોમાં ખૂબ જ તણાવપૂર્ણ પરિસ્થિતિ હતી. શિવમોગામાં વધારાના દળો મોકલવામાં આવ્યા છે. રેડ્ડીએ જણાવ્યું હતું કે હત્યા બાદ શહેરમાં આગચંપી અને હિંસાની 14 અલગ-અલગ ઘટનાઓ બની હતી. હત્યા અને આગચંપીના ત્રણ કેસમાં એફઆઈઆર નોંધવામાં આવી છે. અન્ય કેસમાં પણ એફઆઈઆર નોંધવામાં આવશે. પોલીસ આ ઘટનાઓમાં જે લોકોને નુકસાન થયું છે તે શોધવાનો પ્રયાસ કરી રહી છે.

રવિવારે હત્યા કરવામાં આવી હતી

ઉલ્લેખનીય છે કે શહેરના ભારતી નગરમાં રવિવારે રાત્રે કારમાં આવેલા કેટલાક લોકોએ બજરંગ દળના કાર્યકર્તાની હત્યા કરી હતી. પોલીસને હત્યામાં સાત લોકોની સંડોવણી હોવાની આશંકા છે. આ ઘટના બાદ શિવમોગામાં સ્થિતિ તંગ છે. હાલ સમગ્ર વિસ્તારમાં કલમ 144 લાગુ છે.