હવે સિદ્ધુના માર્ગે આઝાદ! જમ્મુ-કાશ્મીર કોંગ્રેસમાં ભડકો

સોનિયા ગાંધી જમ્મુ-કાશ્મીરમાં ઉભા થયેલા સંકટને ખાળવામાં લાગ્યા
ગુલામ નબી આઝાદના સમર્થકોએ આપ્યા ટપોટપ રાજીનામા
છેલ્લા બે દિવસથી ગુલામ નબી આઝાદ જમ્મુ-કાશ્મીરમાં છે

જમ્મુ-કાશ્મીરમાં કોંગ્રેસની મુશ્કેલીઓ વધી રહી છે. જે રીતે પંજાબ કોંગ્રેસના અધ્યક્ષ નવજોત સિંહ સિદ્ધુએ પડકાર ફેંક્યો હતો, હવે ગુલામ નબી આઝાદ પણ તે જ માર્ગ પર ચાલતા જોવા મળી રહ્યા છે. આઝાદના નજીકના તમામ નેતાઓના રાજીનામા બાદ તેમના સમર્થકોએ શુક્રવારે કઠુઆમાં રેલી કરીને પોતાની રાજકીય શક્તિ બતાવી છે. આ દરમિયાન કોંગ્રેસ હાઈકમાન્ડને સ્પષ્ટ સંદેશ આપવામાં આવ્યો છે કે ગુલામ નબી આઝાદને જમ્મુ-કાશ્મીરમાં મુખ્યમંત્રી પદના ઉમેદવાર તરીકે જાહેર કરવામાં આવે. આવી સ્થિતિમાં કોંગ્રેસની આંતરિક કટોકટી વધુ ઘેરી બની રહી છે.

ગુલામ નબીને સીએમનો ચહેરો બનાવવાની માંગ

કોંગ્રેસના વરિષ્ઠ નેતા અને જમ્મુ-કાશ્મીરના પૂર્વ ડેપ્યુટી સીએમ તારા ચંદે કહ્યું કે સમગ્ર જમ્મુ-કાશ્મીર ઈચ્છે છે કે ગુલામ નબી આઝાદ આગામી સીએમ બને. અમે ઈચ્છીએ છીએ કે આઝાદ સાહેબને કોંગ્રેસના મુખ્યમંત્રી પદના ઉમેદવાર તરીકે રજૂ કરવામાં આવે. તો બીજી તરફ, કોંગ્રેસના પૂર્વ ધારાસભ્ય ચૌધરી અકરમે પણ કઠુઆ રેલીમાં સ્પષ્ટ કહ્યું કે ગુલામ નબી આઝાદ જમ્મુ-કાશ્મીરની કમાન સંભાળશે, તો જ અમે જીતી શકીશું નહીં તો રાજ્યમાં અમને 12 બેઠકો પણ નહીં મળે.

ચૌધરી અકરમે ખુદ પોતાની સીટ ખતરામાં હોવાની સંભાવના વ્યક્ત કરતા ગુલામ નબી આઝાદને કહ્યું કે અમે તમારા કારણે જ કોંગ્રેસ પાર્ટીમાં છીએ અને તમે અમારો ચહેરો છો. આ ઉપરાંત કોંગ્રેસના પૂર્વ એમએલસી સુભાષ ગુપ્તાએ પણ કહ્યું કે અમે ઈચ્છીએ છીએ કે ગુલામ નબી આઝાદ જમ્મુ-કાશ્મીરમાં પાર્ટીની કમાન સંભાળે. જમ્મુ અને કાશ્મીરમાં એકમાત્ર એવા નેતા છે જે રાજ્યના પ્રશ્નો હલ કરી શકે છે.

જમ્મુ-કાશ્મીરમાં રાજકીય સંકટ

પંજાબ, રાજસ્થાન અને છત્તીસગઢ બાદ જમ્મુ અને કાશ્મીરમાં કોંગ્રેસની મુશ્કેલી વધ છે, જ્યાં સીમાંકન બાદ વિધાનસભાની ચૂંટણીનો પ્રસ્તાવ છે. આવી સ્થિતિમાં પૂર્વ મુખ્યમંત્રી ગુલામ નબી આઝાદના સમર્થકો મોટી સંખ્યામાં રાજીનામા આપી રહ્યા છે. 20 ની આસપાસ કોંગ્રેસના અસંતુષ્ટોમાં મોટાભાગે રાજ્ય પક્ષના પદાધિકારીઓ, ભૂતપૂર્વ પ્રધાનો અને ખીણ અને જમ્મુ ક્ષેત્રના પ્રભાવશાળી નેતાઓનો સમાવેશ થાય છે.