મેક્સિકોમાં અંધાધૂંધ ગોળીબાર, મેયર સહિત 18 લોકોના મોતથી ફફડાટ

• મેક્સિકોમાં ખુલ્લેઆમ ફાયરિંગની ઘટનાથી ખળભળાટ
• મેક્સિકોના સિટી હોલમાં બંદૂકધારીઓએ ગોળીબારથી આતંક મચાવ્યો
• મેયર કોનરાડો મેન્ડોઝા, તેમના પિતા અને ભૂતપૂર્વ મેયર જુઆન મેન્ડોઝાનું પણ મોત

અમેરિકામાં ગોળીબારની ઘટનાઓની અસર હવે પાડોશી દેશોમાં પણ જોવા મળી રહી છે. અમેરિકાના પાડોશી દેશ મેક્સિકોમાં ગુરુવારે ખુલ્લેઆમ ફાયરિંગની ઘટના સામે આવી છે. મેક્સિકો સિટી હોલમાં બંદૂકધારીઓએ ગોળીબાર કર્યો હતો, જેમાં મેયર સહિત 18 લોકોના મોત થયા હતા.

ઘટનાસ્થળ પર હાજર લોકોના જણાવ્યા અનુસાર, બુધવારે બપોરે અચાનક બંદૂકધારી ગ્યુરેરો રાજ્યના સેન મિગુએલ ટોટોલાપનના સિટી હોલમાં પહોંચી ગયો અને લોકો પર ગોળીબાર શરૂ કરી દીધો. ગોળીબારમાં માર્યા ગયેલા લોકોમાં મેયર કોનરાડો મેન્ડોઝા, તેમના પિતા અને ભૂતપૂર્વ મેયર જુઆન મેન્ડોઝા તેમજ સાત પોલીસકર્મીઓનો પણ સમાવેશ થાય છે. સાવચેતી રાખીને પોલીસે હુમલા બાદ આખા શહેરની નાકાબંધી કરીને આરોપીઓને પકડવાનો પ્રયાસ કર્યો હતો, જોકે હજુ સુધી તેઓની ધરપકડ કરવામાં આવી નથી. પોલીસ વ્યૂહરચના બનાવીને ગુનો આચરવામાં આવ્યો હોય તેવું કહી રહ્યા છે.

ઘટનાની કેટલીક તસવીરો પણ સામે આવી છે, જેમાં સિટી હોલની દિવાલો પર ગોળીઓના નિશાન દેખાઈ રહ્યા છે. હોલની બારીના કાચ પણ તૂટેલા છે. ખરેખર, અમેરિકામાં સામૂહિક ગોળીબારની ઘટનાઓ દરરોજ સામે આવતી રહે છે. હવે મેક્સિકોમાં પણ આવી ઘટનાઓ બનવા લાગી છે. જો કે, મેક્સિકોમાં બનેલી ઘટનાઓ મોટાભાગે ડ્રગ સ્મગલરો વચ્ચે ફાયરિંગ અથવા ગેંગ વોર સાથે સંબંધિત છે.

અમેરિકામાં સામૂહિક ગોળીબારની 5 મોટી ઘટનાઓ

1. અમેરિકાના ઈન્ડિયાનામાં 18 જુલાઈના રોજ ગ્રીનવુડ પાર્ક મોલમાં ફાયરિંગની ઘટના બની હતી. સામૂહિક ગોળીબાર દરમિયાન 10 લોકો ગોળીબારનો ભોગ બન્યા હતા. જેમાંથી 3ના મોત થયા હતા.

2. 11 જુલાઈના રોજ કેલિફોર્નિયાના દક્ષિણ ભાગમાં એક હાઉસ પાર્ટી દરમિયાન હુમલાખોરે અંધાધૂંધ ગોળીબાર કર્યો હતો. આ ઘટનામાં એક મહિલા સહિત 5 લોકોને ગોળી વાગી હતી, જેમાંથી 3 લોકોએ જીવ ગુમાવ્યો હતો.

3. 4 જુલાઈના રોજ અમેરિકામાં 246મો સ્વતંત્રતા દિવસ ઉજવાઈ રહ્યો હતો. આ દરમિયાન શિકાગોના ઈલિનોઈસના હાઈલેન્ડ પાર્કમાં પરેડનું આયોજન કરવામાં આવ્યું હતું. અહીં અચાનક ગોળીબાર શરૂ થયો, જેમાં 6 લોકોના મોત થયા. બીજા જ દિવસે, 5 જુલાઈએ, ઇન્ડિયાનાના બ્રેનિયાના ગેરી વિસ્તારમાં ફાયરિંગને કારણે 3 લોકોએ જીવ ગુમાવ્યો.

4. ઓક્લાહોમાના તુલસામાં 1 જૂનના રોજ એક વ્યક્તિએ હોસ્પિટલની બિલ્ડિંગમાં ઘૂસીને ગોળીબાર કર્યો હતો. આ ઘટનામાં 4 લોકોના મોત થયા હતા. ગુનાને અંજામ આપ્યા બાદ હુમલાખોરે પોતાનો જીવ પણ લઈ લીધો હતો.

5. સૌથી ખતરનાક ઘટના અમેરિકાના ટેક્સાસમાં 15 મેના રોજ પ્રકાશમાં આવી હતી. જ્યારે 18 વર્ષના છોકરાએ ઉવાલ્ડે શહેરમાં સ્કૂલમાં ઘૂસીને ગોળીબાર કર્યો હતો અને 19 વિદ્યાર્થીઓ સહિત 23 લોકોના મોત થયા હતા. આ હુમલામાં 3 શિક્ષકોએ પણ જીવ ગુમાવ્યો હતો.