26/11 મુંબઇ આતંકી હુમલાના માસ્ટરમાઇંડને પાકિસ્તાને મૃત જાહેર કર્યો હતો, હવે ઝડપાયો

• આતંકવાદી સાજીદ મીરને 15 વર્ષથી વધુની જેલની સજા ફટકારાઇ
• સાજિદ મીર પર 2008ના મુંબઈ હુમલામાં સંડોવણીનો આરોપ છે
• FATFને બતાવવા માટે પાકિસ્તાન આ કાર્યવાહી કરી રહ્યું છે

પાકિસ્તાને 2008ના મુંબઈ આતંકી હુમલાના માસ્ટર માઈન્ડ સાજિદ મીરની અટકાયત કરી છે. FBIની મોસ્ટ વોન્ટેડ આતંકીઓની યાદીમાં સામેલ સાજિદ મીર પર હુમલાને અંજામ આપવામાં મહત્વની ભૂમિકા ભજવવાનો આરોપ છે. આ એ જ સાજિદ મીર છે, જેની હાજરી પાકિસ્તાન હંમેશાથી નકારતું આવ્યું છે. પાકિસ્તાન સરકારે તો સાજિદ મીર મૃત્યુ પામ્યો હોવાનો દાવો પણ કર્યો હતો. કહેવામાં આવી રહ્યું છે કે, સાજિદ મીરની કસ્ટડીમાંથી પાકિસ્તાન આતંકવાદને કારણે પોતાની કલંકિત બાજુ સાફ કરવા માગે છે.

પાકિસ્તાનની આતંકવાદ વિરોધી અદાલતે 2008ના મુંબઈ હુમલાના માસ્ટરમાઇન્ડને આતંકવાદને નાણાં પૂરા પાડવાના કેસમાં 15 વર્ષથી વધુની જેલની સજા ફટકારી છે. લશ્કર-એ-તૈયબા અને જમાત-ઉદ-દાવાના નેતાઓના આતંકવાદને નાણાં પૂરા પાડવાના કેસ સાથે કામ કરતા વરિષ્ઠ વકીલે જણાવ્યું હતું કે, "આ મહિનાની શરૂઆતમાં, લાહોરની એક આતંકવાદ વિરોધી અદાલતે પ્રતિબંધિત લશ્કર-એ-તૈયબાથી સંકળાયેલા સાજિદ મજીદ મીરને 15 વર્ષની જેલની સજા ફટકારવામાં આવી છે."

કોણ છે સાજીદ મીર

FBIએ સાજિદ મીર પર $5 મિલિયનનું ઇનામ રાખ્યું છે. અમેરિકા અને ભારત છેલ્લા એક દાયકાથી આ આતંકવાદીને શોધી રહ્યા છે. સાજિદ મીર સંયુક્ત રાષ્ટ્રમાં પ્રતિબંધિત આતંકવાદી સંગઠન લશ્કર-એ-તૈયબા સાથે સંકળાયેલો છે. તેણે ડેવિડ કોલમેન હેડલી સહિત અન્ય આતંકવાદીઓ સાથે મળીને મુંબઈમાં આતંકવાદી હુમલાની યોજના ઘડી હતી. તે લશ્કરના વડા હાફિઝ મોહમ્મદ સઈદના પણ નજીકના માનવામાં આવે છે.

પાકિસ્તાનનો હેતુ શું છે

પાકિસ્તાન સાજિદ મીરની ધરપકડ કરીને બતાવવા માગે છે કે, તે આતંકવાદ વિરુદ્ધ કામ કરી રહ્યું છે. આ ધરપકડને ફાઇનાન્શિયલ એક્શન ટાસ્ક ફોર્સની ગ્રે લિસ્ટમાંથી બહાર આવવાની યોજના કહેવામાં આવી રહી છે. પાકિસ્તાન જૂન 2018થી FATFની ગ્રે લિસ્ટમાં સામેલ છે. આ વખતે જર્મનીમાં યોજાયેલી બેઠકમાં FATFએ કહ્યું હતું કે, તે પાકિસ્તાનના ગ્રાઉન્ડ વેરિફિકેશન અને ગ્રે લિસ્ટમાંથી બાકાત રાખવા અંગે નિર્ણય આપશે. આવી સ્થિતિમાં પાકિસ્તાન બતાવવા માગે છે કે, તે આતંકવાદ વિરુદ્ધ કામ કરી રહ્યું છે.

સાજિદ લખવીનો સુરક્ષા વડા હતો

સાજિદ મીર 2010 સુધી લશ્કર-એ-તૈયબાના ચીફ ઓફ ઓપરેશન્સ ઝકી-ઉર-રહેમાન લખવીની સુરક્ષાની જવાબદારી સંભાળતો હતો. તેણે માત્ર વિદેશમાં આતંકવાદીઓની ભરતી કરી ન હતી પરંતુ પાકિસ્તાનમાં આતંકી કેમ્પો પણ ચલાવ્યા હતા અને તે ISIના ઈન્ડિયન મુજાહિદ્દીન ઓપરેશનનો પણ ભાગ હતો, જેને કરાચી પ્રોજેક્ટ કહેવામાં આવતું હતું.