લેડી ડોન-મહિલા કેદી વચ્ચે જાહેરમાં ચાલતાં લેસ્બિયન સંબંધોથી અન્ય કેદીઓ પરેશાન

સાબરમતી જેલમાં મોબાઈલ, તમાકુના વેપલાના લેટરથી ખળભળાટ
લેડી ડોન અન્ય કેદીઓના નાસ્તા પડાવી લેતી હતી : જેલ સત્તાવાળાની ઈન્કવાયરી શરૂ
સાહેબ, તમારી પેનમાં તાકાત નથી, એક મર્ડરની સજા 20 વર્ષ તો 10 મર્ડરની પણ એટલી જ છે.

સાબરમતી સેન્ટ્રલ જેલમાં મહિલા વોર્ડમાં લેડી ડોન અને અન્ય મહિલા કેદી વચ્ચે પ્રેમપ્રકરણ ચાલતું હોવાનું તેમજ આ પ્રેમીજોડા દ્વારા જાહેરમાં થતા લેસ્બિયન સબંધોથી અન્ય મહિલા કેદીઓ પરેશાન હોવાના લેટરથી ખળભળાટ મચ્યો છે. આ લેટરમાં લેડીડોનની દાદાગીરી, ધાકધમકીથી અન્ય મહિલા કેદીઓ પરેશાન હોવાની વિગતોનો ઉલ્લેખ છે. મહિલા કેદીઓની કુપન અને નાસ્તા પણ આ લેડી ડોન પડાવી લેતી હોવાનું તેમજ મહિલા વોર્ડમાં મોબાઈલ ફોનના કોલ દીઠ રૂ.50, તમાકુના પેકેટના રૂ.500 અને સિગારેટના રૂ.100 લઈ ગેરકાયદેસર વેપાર કરતી હોવાની વિગતો પત્રમાં છે. લેડી ડોન પર આક્ષેપો કરતો પત્ર જેલના ઉચ્ચ અધિકારીઓને પણ મળ્યો હોવાથી તેઓએ આ મામલે ઈન્કવાયરી શરૂ કરી છે. જો કે, સાબરમતી જેલના મહિલા વિભાગમાં સ્ટ્રોંગ જામર હોવાથી મોબાઈલ ફોન રાખી કોલ કરવાનું નેટવર્ક શક્ય ન હોવાનું તેઓ જણાવી રહ્યા છે.

લેડી ડોનથી જેલના અધિકારીઓ પણ ડરતા હોવાનું અને તે અધિકારીઓને ખુલ્લેઆમ બદલી કરાવી દેવાની ધમકી આપતી હોવાનું પત્રમાં જણાવ્યું છે. લેડી ડોન તેનું કામ અન્ય મહિલા કેદી પાસે ધાકધમકી આપી કરાવે અને પગાર પોતે લઈ લે છે. તેણે અગાઉ રસોડામાં મુકવામાં આવી ત્યારે વીશીમાંથી સામાનની ચોરી કરી હતી. તે મહિલા કેદીઓ સાથે લડાઈ કરતી તેમજ વારંવાર કોઈની સાથે તકરાર થાય તો રસોડામાંથી ચપ્પુ લઈ મારવાની ધમકી આપતી હતી. આ અંગે અંદરખાને ફરિયાદ થતાં અધિકારીઓએ લેડી ડોનને સફાઈ કામ માટે મૂકી હતી. આ જગ્યાએ પણ કામ કર્યા વગર તે પોતાનો પગાર અધિકારીઓને ધમકી આપી ભરાવે છે. લેડી ડોનને અન્ય મહિલા કેદી સાથે લેસ્બિયન સબંધો હોવાથી બંને બેરેકના ટોઈલેટમાં જાહેરમાં શારીરિક ચેષ્ટાઓ કરતી હોવાથી અન્ય વૃદ્ધ મહિલા કેદીઓ શરમના માર્યા ઢાબળો ઓઢી રડયા કરે છે. અગાઉ લેડી ડોનનું પૈસાનું કૌભાંડ પકડાતા તેણે બરોડા મધ્યસ્થ જેલમાં ખસેડી પરંતુ તે ત્યાંથી પરત સાબરમતી જેલમાં આવી હતી. આ મુદ્દે જેલ અધિકારીઓને રાઉન્ડ દરમિયાન મહિલા કેદીઓ ફરિયાદ કરી શકતી નથી કેમકે લેડી ડોન ત્યાં પણ હાજર હોય તેમજ અન્ય કેદી સાથે તેના પ્રેમ સબંધો વિશે મહિલા કેદીઓ રાઉન્ડમાં પુરૂષ અધિકારી હોવાથી વાત કરતા સંકોચ અનુભવે છે.

આ અંગે સાબરમતી સેન્ટ્રલ જેલના એસપી રોહન આનંદે જણાવ્યું હતું કે, આ પ્રકારના આક્ષેપો કરતો પત્ર અમને મળ્યો છે, જે પત્રની ખરાઈ અને તેમાં થયેલા આક્ષેપો બાબતે અમે ઈન્કવાયરી શરૂ કરી છે.જો કે, મહિલા વિભાગમાં કેદી માટે મોબાઈલ વાપરવો અશક્ય બાબત છે. આ વિભાગમાં જામર એટલા સ્ટ્રોંગ છે કે, ત્યાંથી ફોન ઓપરેટ થઈ શકે તેમ નથી. મોબાઈલ ફોન કોઈ મહિલા કેદી પાસે હોય તે વાત માનવામાં આવે તેવી નથી.