સ્કિલ ડેવલપમેન્ટ : MGLI અને ITIમાં જૂનથી 51 નવા રોજગારલક્ષી કોર્સ શરૂ થશે

ડ્રોનને લગતાં 3 ટૂંકાગાળાના અભ્યાસક્રમો ભણાવાશે
કૌશલ્ય સ્કિલ યુનિ.ના ભાગરૂપે આ નવા અભ્યાસક્રમો ચાલશે
લોકોને તાલીમ આપવાનું શ્રામ-રોજગાર વિભાગનું લક્ષ્ય

રાજ્યનો શ્રામ અને રોજગાર વિભાગ આવતા જૂનથી કૌશલ્ય સ્કિલ યુનિવર્સિટી અંતર્ગત 51 જેટલા નવા ટૂંકાગાળાના સ્વરોજગારલક્ષી અભ્યાસક્રમો શરૂ કરશે. કૌશલ્ય સ્કિલ યુનિવર્સિટી અમદાવાદમાં શીલજ ખાતે આકાર લેવાની છે, પરંતુ એ પહેલાં કામચલાઉ ધોરણે આ યુનિવર્સિટી, મહાત્મા ગાંધી લેબર ઇન્સ્ટિટયૂટમાં અભ્યાસક્રમો શરૂ કરી દેશે. આ અભ્યાસક્રમો 50 જેટલી આઇટીઆઇમાં પણ શરૂ થવાના છે.

કૌશલ્ય સ્કિલ યુનિવર્સિટીમાં સ્કૂલ ઓફ ડ્રોન્સ પણ શરૂ થનારી છે, જેના ત્રણ અભ્યાસક્રમો પણ જૂનથી જ શરૂ થઈ રહ્યા છે, જેમાં એક સપ્તાહનો ડ્રોન ફ્લાઇંગ અભ્યાસક્રમ તેમજ ત્રણ-ત્રણ મહિનાના ડ્રોન એસેમ્બ્લિગ-મેન્યુફેક્ચરિંગ તથા ડ્રોન ટેક્નોલોજી જેવા અભ્યાસક્રમો સામેલ છે.

શ્રામ-રોજગાર અગ્ર સચિવ અંજુ શર્માએ જણાવ્યું હતું કે, ડ્રોન સંબંધિત આ ત્રણ અભ્યાસક્રમોમાં 20 હજાર લોકોને આવતા પાંચ વર્ષમાં સ્વરોજગાર માટે તાલીમ આપવાનો ટાર્ગેટ છે કે જેથી કૃષિ ક્ષેત્રે પેસ્ટિસાઇડ દવાઓ તથા ફર્ટિલાઇઝર્સના છંટકાવમાં માઇનિંગ સર્વેલેન્સમાં, આરોગ્ય ક્ષેત્રે બ્લડ સેમ્પલિંગ-વેક્સિનની ડિલિવરીમાં આ ટેક્નોલોજીનો વ્યાપક ઉપયોગ થઈ શકે.

જે 51 જેટલા ટૂંકાગાળાના નવા સ્વરોજગાર અભ્યાસક્રમો એમજીએલઆઇમાં શરૂ થઈ રહ્યા છે તેમાં ક્લાઉડ ટેક્નોલોજી-ક્લાઉડ કમ્પ્યૂટિંગ, રોબોટિક્સ, થ્રીડી પ્રિન્ટિંગ, કેડકેમ, સોલર ટેક્નોલોજી, લેટેસ્ટ પ્લમ્બિંગ ટેક્નોલોજી, ડિજિટલ માર્કેટિંગ, ઇ-કોમર્સ વગેરે અભ્યાસક્રમો સામેલ થશે. આ નવા અભ્યાસક્રમોમાં 50 હજાર લોકોને તાલીમ આપવાનું શ્રામ-રોજગાર વિભાગનું લક્ષ્ય છે.