NCPમાં ભંગાણ, આજે કાકા પવારનું સતારામાં શક્તિ પ્રદર્શન
- NCP નેતા અજિત પવારે શિંદે સરકારને ટેકો આપ્યો
- મહારાષ્ટ્ર સરકારમાં નાયબ મુખ્ય પ્રધાનનું પદ આપવામાં આવ્યું
- અજિત પવારની સાથે NCPના 9 ધારાસભ્યોએ મંત્રી તરીકે શપથ લીધા
રવિવારે મહારાષ્ટ્રના રાજકારણમાં મોટી ઉથલપાથલ જોવા મળી હતી. NCP નેતા અજિત પવારે શિંદે સરકારને ટેકો આપ્યો. તેમને મહારાષ્ટ્ર સરકારમાં નાયબ મુખ્ય પ્રધાનનું પદ આપવામાં આવ્યું હતું. અજિત પવારની સાથે NCPના 9 ધારાસભ્યોએ મંત્રી તરીકે શપથ લીધા છે. આ રાજકીય પરિવર્તન બાદ મહારાષ્ટ્રમાં ટ્રિપલ એન્જિનની સરકાર બની છે. અહીં સુપ્રિયા સુલે શરદ પવારને મળવા પહોંચ્યા હતા. તેમણે કહ્યું કે આનાથી વિરોધ પક્ષોની એકતા પર કોઈ અસર નહીં થાય. આ ઘટનાક્રમ બાદ તેમના પિતા અને એનસીપી પ્રમુખ શરદ પવારનું કદ વધુ વધશે.
અજિત પવારના બંગલે મહત્વપૂર્ણ બેઠક
આજે સવારે દેવગીરી સ્થિત અજિત પવારના સત્તાવાર બંગલે એક મહત્વપૂર્ણ બેઠક બોલાવવામાં આવી છે. જેમાં અજિત પવારના સમર્થક ધારાસભ્યો આ બેઠકમાં વધુ રણનીતિ અંગે ચર્ચા કરવામાં આવશે તેવું માનવામાં આવે છે.
શરદ પવાર પુણેથી સતારા જવા રવાના થયા
NCP સુપ્રીમો શરદ પવાર આજે સવારે તેમના પુણેના નિવાસસ્થાનેથી નીકળી ગયા છે. માનવામાં આવે છે કે આજે તેઓ પાર્ટીના બાકીના નેતાઓ અને ધારાસભ્યો સાથે મહત્વપૂર્ણ બેઠક કરશે. આ સાથે પાર્ટીના બળવાખોર ધારાસભ્યો અને નેતાઓ સામે કાર્યવાહી કરે તેવી પણ શક્યતા છે. હાલમાં તેઓ યશવંતરાવ ચવ્હાણના સમાધિ સ્થળની મુલાકાત લેવા માટે સતારા જવા રવાના થયા છે.
