પંજાબના પૂર્વ મુખ્યમંત્રી પ્રકાશ સિંહ બાદલનુ નિધન

• 95 વર્ષની જૈફ વયે પ્રકાશ સિંહ બાદલનુ નિધન 
• મોહલીની હોસ્પિટલમાં લીધા અંતિમ શ્વાસ
• છેલ્લા ઘણા દિવસોથી હોસ્પિટલમાં દાખલ હતા

પંજાબના પૂર્વ સીએમ પ્રકાશ સિંહ બાદલનું મંગળવારે મોહાલીની એક ખાનગી હોસ્પિટલમાં નિધન થયું હતું. તેઓ 95 વર્ષના હતા. તેઓ છેલ્લા ઘણા દિવસોથી હોસ્પિટલમાં દાખલ હતા. પ્રકાશ સિંહ બાદલ 5 વખત પંજાબના મુખ્યમંત્રી રહી ચૂક્યા છે. પ્રકાશ સિંહ બાદલનો જન્મ 8 ડિસેમ્બર, 1927ના રોજ પંજાબના એક નાનકડા ગામ અબુલ ખુરાનાના જાટ શીખ પરિવારમાં થયો હતો. પ્રકાશ સિંહ બાદલની પત્ની સુરિન્દર કૌરનું પણ નિધન થયું છે. શિરોમણી અકાલી દળના પ્રમુખ સુખબીર બાદલ તેમના પુત્ર છે.

વડાપ્રધાન મોદીએ શોક વ્યક્ત કર્યો
વડાપ્રધાન નરેન્દ્ર મોદીએ પ્રકાશ સિંહ બાદલના નિધન પર કહ્યું હતું કે, પ્રકાશ સિંહ બાદલજીના નિધનથી ખૂબ જ દુઃખી છું. તેઓ ભારતીય રાજનીતિના પ્રચંડ વ્યક્તિ હતા, અને એક નોંધપાત્ર રાજનેતા હતા જેમણે આપણા રાષ્ટ્ર માટે ઘણું યોગદાન આપ્યું હતું. તેમણે પંજાબની પ્રગતિ માટે અથાક મહેનત કરી અને નિર્ણાયક સમયમાં રાજ્યનું સંચાલન કર્યું.

આઝાદીના વર્ષમાં રાજકારણમાં પ્રવેશ કર્યો
પ્રકાશ સિંહ બાદલે 1947માં રાજકારણમાં પ્રવેશ કર્યો હતો. 1957માં પ્રથમ વિધાનસભા ચૂંટણી જીતી. 1969માં પ્રકાશ સિંહ બાદલ ફરી ધારાસભ્ય બન્યા. જ્યારે પ્રકાશ સિંહ બાદલ 1970-71, 1977-80, 1997-2002 સુધી પંજાબના મુખ્યમંત્રી હતા. તે જ સમયે, 1972, 1980 અને 2002માં, વિપક્ષના નેતા પણ હતા. પ્રકાશ સિંહ બાદલ સંસદ સભ્ય પણ રહી ચૂક્યા છે. તેઓ કેન્દ્રમાં મંત્રી તરીકે પણ રહી ચૂક્યા છે. 1 માર્ચ, 2007થી 2017 સુધી, તેમણે બે વખત મુખ્યમંત્રી તરીકેની જવાબદારી નિભાવી હતી.

પ્રકાશ સિંહ બાદલજી એક રાજકીય દિગ્ગજ હતા
રક્ષા મંત્રી રાજનાથ સિંહે પણ ટ્વીટ કરીને પ્રકાશ સિંહ બાદલના નિધન અંગે લખ્યું કે, પ્રકાશ સિંહ બાદલજી એક રાજકીય દિગ્ગજ હતા જેમણે ઘણા દાયકાઓ સુધી પંજાબની રાજનીતિમાં મહત્વપૂર્ણ ભૂમિકા ભજવી હતી. તેમની લાંબી રાજકીય અને વહીવટી કારકિર્દીમાં, તેમણે ખેડૂતો અને આપણા સમાજના અન્ય નબળા વર્ગોના કલ્યાણ માટે ઘણા નોંધપાત્ર યોગદાન આપ્યા છે.