જમ્મુ કાશ્મીરના પુંચમાં સુરક્ષાદળો અને આતંકીઓ વચ્ચે એન્કાઉન્ટર, JCO અને એક જવાન શહીદ

જમ્મુ કાશ્મીરના પુંચમાં સુરક્ષાદળો અને આતંકીઓ વચ્ચે એન્કાઉન્ટર, JCO અને એક જવાન શહીદ

જમ્મુ કાશ્મીરમાં સોમવાર પછી ગુરૂવારે આતંકીઓ અને સિક્યોરિટી ફોર્સ વચ્ચે અથડામણ થઈ છે. જેમાં એક જૂનિયર કમિશન્ડ ઓફિસર (JCO) અને એક જવાન શહીદ થયા છે. આ એન્કાઉન્ટર જમ્મુ-રાજૌરી-પુંચ નેશનલ હાઈવે નજીક ભીમ્બર ગલી વિસ્તારમાં થયું છે, જે મેંઢર સબ ડિવિઝનમાં આવે છે. અહીં ભાટા ધૂરિયાં ગામ છે અને આ ગામમાં જ સર્ચ ઓપરેશન કરી રહેલા સૈન્યના જવાનો પર આતંકીઓએ ફાયરિંગ કર્યું.

આ પહેલા સોમવારે આ વિસ્તારમાં જ આતંકીઓએ હુમલો કર્યો હતો જેમાં પાંચ જવાન શહીદ થયા હતા.

નજીકના વિસ્તારમાં જ અથડામણ
મીડિયા રિપોટ્સ મુજબ ત્રણ દિવસ પહેલાં જે ડેરાની ગલી વિસ્તારમાં એનકાઉન્ટર થયું હતું, ગુરૂવારે પણ તે જ વિસ્તારથી થોડે દૂર અથડામણ થઈ. હાલ પણ ફાયરિંગ યથાવત છે.

એક અધિકારીના જણાવ્યા મુજબ સુરક્ષા દળના જવાનો અહીં આતંકવાદ વિરોધી અભિયાન ચલાવી રહ્યાં છે. આ વિસ્તારમાં ગાઢ જંગલ છે અને આ વિસ્તાર રાજૌરી અને પુંચ જિલ્લાને જોડે છે. સુરક્ષા દળોએ ગુરૂવારે ભાટા ભૂરિયાં વિસ્તારને ઘેરી લીધું હતું.

આતંકીઓએ ફાયરિંગ શરૂ કર્યું
એક અધિકારીના જણાવ્યા મુજબ- સુરક્ષા દળોએ વિસ્તારને ઘેરી લીધા બાદ અહીં સર્ચ ઓપરેશન શરૂ કર્યું. આ દરમિયાન છુપાયેલા આતંકીઓએ સુરક્ષા દળોના જવાનો પર ફાયરિંગ શરૂ કરી દીધું. આ દરમિયાન એક JCO અને એક જવાનને ગોળી વાગી હતી. તેઓને નજીકની હોસ્પિટલ પહોંચાડવામાં આવ્યા પરંતુ તેઓને બચાવવામાં સફળતા ન મળી. જે બાદ સુરક્ષા દળોની વધુ એક ટીમને ઘટના સ્થળે મોકલવામાં આવી. સુરક્ષા વધુ મજબૂત બનાવી સર્ચ ઓપરેશન યથાવત રાખવામાં આવ્યું.

આ વિસ્તારમાં સતત ચોથા દિવસ સર્ચ ઓપરેશન ચલાવવામાં આવી રહ્યું છે. 12 ઓક્ટોબરે આ વિસ્તારમાં આપણાં પાંચ જવાન શહીદ થયા હતા. હજુ સુધી તે સ્પષ્ટ નથી થયું કે અહીં કયા ગ્રુપના આતંકીઓ છુપાયેલા છે. સેનાની સામે સવાલ છે કે શું આ તે જ આતંકીઓ છે જેઓએ સોમવારે પાંચ જવાનોના જીવ લીધા હતા કે કોઈ અન્ય ગ્રુપના આતંકીઓ છે. હાલ પુંચ-રાજૌરી હાઈવે પર ટ્રાફિક બંધ કરી દેવાયો છે.