ધોનીની જગ્યાએ રવિન્દ્ર જાડેજા CSKનો બન્યો કેપ્ટન

મહેન્દ્ર સિંહ ધોનીએ છોડી કેપ્ટનશીપ
IPL 2022ની 26મી માર્ચથી થશે શરૂઆત
પહેલી મેચ ચેન્નાઇ અને કોલકત્તા ટીમની વચ્ચે

ઈન્ડિયન પ્રીમિયર લીગ (IPL)માં ગુરુવારે મોટો ફેરફાર કરવામાં આવ્યો છે. મહેન્દ્ર સિંહ ધોનીએ ચેન્નાઈ સુપર કિંગ્સ (CSK)ની કેપ્ટન્સી છોડી દીધી છે. તેના સ્થાને ઓલરાઉન્ડર રવિન્દ્ર જાડેજાને કમાન સોંપવામાં આવી છે.

આ વખતે ચેન્નાઈની ટીમે જાડેજા અને ધોની સહિત 4 ખેલાડીઓને રિટેન કર્યા હતા. જાડેજાને ફ્રેન્ચાઇઝીએ રૂ.16 કરોડમાં જાળવી રાખ્યો હતો. જ્યારે ધોનીને આ સિઝન માટે માત્ર 12 કરોડમાં જ રિટેન કરવામાં આવ્યો હતો. આના પરથી શરૂઆતથી જ અનુમાન લગાવવામાં આવ્યું હતું કે જાડેજાને કેપ્ટન બનાવવામાં આવી શકે છે. તેના સિવાય મોઈન અલીને 8 કરોડ અને ઋતુરાજ ગાયકવાડને 6 કરોડમાં રિટેન કરવામાં આવ્યો હતો.

જાડેજા ચેન્નાઈ ટીમનો ત્રીજો કેપ્ટન હશે

જાડેજા 2012થી ચેન્નાઈની ટીમ સાથે છે. તે CSK ટીમનો ત્રીજો કેપ્ટન હશે. મહેન્દ્ર સિંહ ધોની IPLની પ્રથમ સિઝન એટલે કે 2008થી ટીમનું નેતૃત્વ કરી રહ્યો હતો. 213 મેચોમાં કેપ્ટનશિપ કરતી વખતે ધોનીએ 130 મેચમાં ટીમને જીત અપાવી છે. આ વચ્ચે સુરેશ રૈનાએ 6 મેચમાં કેપ્ટનશિપ પણ કરી છે જેમાંથી ટીમ માત્ર 2 મેચ જીતી શકી છે.

ચેન્નાઈ અને કોલકાતા વચ્ચે ઓપનિંગ મેચ

કેપ્ટનશિપમાં આ મોટા ફેરફારનો નિર્ણય ચેન્નાઈ મેનેજમેન્ટે ટુર્નામેન્ટ શરૂ થવાના બે દિવસ પહેલા જ લીધો છે. ટુર્નામેન્ટ 26 માર્ચથી શરૂ થશે. ઓપનિંગ મેચ ડિફેન્ડિંગ ચેમ્પિયન ચેન્નાઈ સુપર કિંગ્સ (CSK) અને કોલકાતા નાઈટ રાઈડર્સ (KKR) વચ્ચે રમાશે. જાડેજાની કપ્તાનીમાં ચેન્નાઈની ટીમ આ વખતે પોતાનું ટાઈટલ બચાવવા અને 5મું ટાઈટલ જીતવાના ઈરાદા સાથે મેદાનમાં ઉતરશે.