એથ્લીટ નીરજ ચોપરાએ ફરી સર્જ્યો ઈતિહાસ, વર્લ્ડ એથ્લીટ ચેમ્પિયનશીપમાં મેળવ્યો ગોલ્ડ મેડલ

• WACમાં ગોલ્ડ મેડલ મેળવનાર પ્રથમ ભારતીય બન્યા
• પાકિસ્તાનના અરશદ નદીમને પાછળ છોડીને રચ્યો ઈતિહાસ
• પીએમ મોદી, અનુરાગ ઠાકુર સહિતના નેતાઓએ આપ્યા અભિનંદન

નીરજ ચોપરાએ બુડાપેસ્ટમાં ચાલી રહેલી વર્લ્ડ એથ્લેટિક્સ ચેમ્પિયનશિપમાં જેવલિન થ્રોમાં ગોલ્ડ મેડલ જીતીને ઈતિહાસ રચ્યો હતો. તેણે બીજા રાઉન્ડમાં 88.17 મીટરના થ્રો સાથે ગોલ્ડ મેડલ કબજે કર્યો હતો. આ સાથે તે વર્લ્ડ એથ્લેટિક્સ ચેમ્પિયનશિપમાં ગોલ્ડ મેડલ જીતનાર પ્રથમ ભારતીય બની ગયો છે. નીરજ ચોપરાની આ સિદ્ધિ પર તેને દેશભરમાંથી અભિનંદન મળી રહ્યા છે.

પીએમ મોદીએ આપ્યા અભિનંદન

પીએમ મોદીએ અભિનંદન આપતાં તેમણે ટ્વિટર પર લખ્યું, ટેલેન્ટેડ નીરજ ચોપરા શ્રેષ્ઠતાનું ઉદાહરણ છે. તેમનું સમર્પણ, ચોકસાઈ અને જુસ્સો તેમને માત્ર એથ્લેટિક્સમાં ચેમ્પિયન જ નહીં પરંતુ સમગ્ર રમત જગતમાં અપ્રતિમ શ્રેષ્ઠતાનું પ્રતીક પણ બનાવે છે. વર્લ્ડ એથ્લેટિક્સ ચેમ્પિયનશિપમાં ગોલ્ડ જીતવા બદલ તેને અભિનંદન.

 

  

 

નીરજે અમને ફરીથી ગૌરવ અપાવ્યું: ભારતીય સેના

ભારતીય સેનાના સુબેદાર નીરજ ચોપરાને વર્લ્ડ એથ્લેટિક્સ ચેમ્પિયનશિપ 2023માં પુરુષોના ભાલા ફેંકમાં 88.17 મીટરના થ્રો સાથે સુવર્ણ ચંદ્રક જીતવા બદલ અભિનંદન પાઠવ્યા છે. નીરજ ચોપરા સેનામાં સુબેદાર તરીકે તૈનાત છે. ભારતીય સેનાએ ટ્વિટર પર લખ્યું, નીરજ ચોપરાએ ફરી એકવાર અમને ગૌરવ અપાવ્યું. બુડાપેસ્ટમાં વર્લ્ડ એથ્લેટિક્સ ચેમ્પિયનશિપ 2023માં 88.17 મીટરના થ્રો સાથે જેવલિન થ્રોમાં ગોલ્ડ મેડલ જીતવા બદલ ભારતીય સેના સુબેદાર નીરજ ચોપરાને અભિનંદન આપે છે.

 

 

 

 

કેન્દ્રીય ખેલ મંત્રી અનુરાગ ઠાકુરે આ ઐતિહાસિક ક્ષણ જણાવી

કેન્દ્રીય રમતગમત મંત્રી અનુરાગ ઠાકુરે નીરજ ચોપરાને ગોલ્ડ મેડલ જીતવા બદલ અભિનંદન પાઠવ્યા હતા. અનુરાગ ઠાકુરે લખ્યું, "નીરજ ચોપડાએ ફરી કરી બતાવ્યું છે. ભારતીય એથ્લેટિક્સના ગોલ્ડન બોયએ વર્લ્ડ એથ્લેટિક્સ ચેમ્પિયનશિપમાં પુરુષોની ભાલા ફેંકની સ્પર્ધા જીતી હતી. આ સાથે નીરજ ચોપરા વર્લ્ડ એથ્લેટિક્સમાં ગોલ્ડ મેડલ જીતનાર પ્રથમ ભારતીય બન્યો હતો. આખા દેશને તમારી સિદ્ધિઓ પર ગર્વ છે અને આ ક્ષણ ભારતીય રમત ઇતિહાસમાં હંમેશા યાદ રાખવામાં આવશે."