7 કલાકની પૂછપરછ બાદ સંજય રાઉતની મોડી રાત્રે ધરપકડ

• - ઇડીએ રાત્રે 12 વાગ્યે સંજય રાઉતની કરી ધરપકડ
• - ઇડીએ કથિત રીતે સંજય રાઉતની રવિવાર સાંજે કસ્ટડી લીધી હતી
• - ઇડી સંજયને ફસાવાનો પ્રયાસ કરે છે: સંજય રાઉતના ભાઇ

એન્ફોર્સમેન્ટ ડિરેક્ટોરેટ (ED) એ આખરે સંજય રાઉતની ધરપકડ કરી છે. EDએ PMLA હેઠળ સંજયની ધરપકડ અડધી રાત્રે એટલે કે 12 વાગ્યે દર્શાવી છે. સંજયનો ભાઈ સુનીલ રાઉત રાત્રે 12.30 વાગે ED ઓફિસ પહોંચ્યા હતા. બાદમાં સુનીલ તેમની સાથે બેગ લઈને પાછો અંદર ગયો હતો. EDએ કથિત રીતે સંજયને રવિવારે સાંજે કસ્ટડીમાં લીધો હતો.

ભાઈ સુનીલ રાઉતે સંજય રાઉતની ધરપકડની માહિતી આપી હતી. તેમણે કહ્યું કે ED સંજય રાઉતથી ડરે છે, તેથી તેની ધરપકડ કરી છે. સુનીલે કહ્યું કે નકલી દસ્તાવેજોની મદદથી સંજય રાઉતને પાત્રા ચાલ સાથે જોડવાના પ્રયાસો કરવામાં આવી રહ્યા છે. તેમનો અવાજ દબાવવા માટે જ આ ધરપકડ કરવામાં આવી છે. જે પણ પૈસા (10 લાખ) મળ્યા હતા તે શિવસૈનિકોની અયોધ્યા મુલાકાતના હતા. એ પૈસા પર એકનાથ શિંદે અયોધ્યાયાત્રા પણ લખેલ છે. કેટલાક શિવસૈનિકોએ ED ઓફિસની બહાર સૂત્રોચ્ચાર પણ કર્યા હતા.

હાલમાં સંજય રાઉતને સોમવારે બપોરે લંચ બાદ પીએમએલએ કોર્ટમાં રજૂ કરવામાં આવશે. મળતી માહિતી મુજબ EDએ સંજય રાઉતના ઘરેથી 11.50 લાખ રૂપિયા પણ જપ્ત કર્યા છે. તો EDના વરિષ્ઠ અધિકારીઓ પણ મોડી રાત્રે દિલ્હીથી મુંબઈ પહોંચી ગયા છે. સંજય રાઉતની પૂછપરછ કરવામાં આવી રહી છે.

ED ઓફિસ પહોંચ્યા બાદ સંજય રાઉતે મીડિયા સાથે વાત પણ કરી હતી. તેમણે કહ્યું કે મહારાષ્ટ્રને નબળું પાડવાના પ્રયાસો થઈ રહ્યા છે, પરંતુ તેઓ ઝૂકશે નહીં. તેમણે કહ્યું કે ED ખોટા પુરાવાઓ બનાવીને તેમની ધરપકડ કરવા માંગે છે. જો કે આ દરમિયાન સંજય રાઉતના વકીલે દાવો કર્યો છે કે તેમને માત્ર પૂછપરછ માટે બોલાવવામાં આવ્યા છે, કસ્ટડીમાં લેવામાં આવ્યા નથી. લગભગ 6 કલાક પછી સંજયની ધરપકડના સમાચાર આવ્યા.

આની પહેલા લગભગ 9 કલાક સુધી EDની ટીમે સંજય રાઉતના ઘરનું સર્ચ કર્યું હતું. ઈડીએ આ દરોડા પાત્રા ચાલ કૌભાંડ સંબંધિત મની લોન્ડરિંગના કેસમાં પાડ્યા હતા. રવિવારે EDની ટીમ સવારે 7 વાગે ભાંડુપમાં રાઉતના ઘરે પહોંચી હતી. સાંજે 4 વાગ્યાની આસપાસ EDએ સંજય રાઉતને કસ્ટડીમાં લીધા હતા. સંજય રાઉતના ઘરની બહાર સમર્થકો એકઠા થયા હતા. તેમણે ED ટીમનો રસ્તો રોકી દીધો. જોકે પોલીસે તેને ત્યાંથી હટાવી દીધો હતો.

ED સંજયને ફસાવવાનો પ્રયાસ કરી રહી છે

સંજય રાઉતના ભાઈ સુનીલ રાઉતે આરોપ લગાવ્યો છે કે સંજય ઉદ્ધવની સૌથી નજીક છે, તેથી તેને EDએ પૂછપરછ માટે બોલાવ્યો છે. ED પાસે સંજય વિરુદ્ધ કોઈ પુરાવા નથી. તે માત્ર એટલું જ પ્લાન કરી રહી છે કે જો આ કેસમાં સંજય સામે કોઈ પુરાવા ન મળે તો તેને અન્ય કોઈ કેસમાં કસ્ટડીમાં લઈ લે.

સંજય રાઉતે કહ્યું- પાર્ટી નહીં છોડો

ED ઓફિસ પહોંચ્યા બાદ સંજય રાઉતે મીડિયા સાથે વાત કરી હતી. તેમણે કહ્યું કે મહારાષ્ટ્રને નબળું પાડવાના પ્રયાસો થઈ રહ્યા છે. પરંતુ તે ઝુકશે નહીં અને પાર્ટી છોડશે નહીં.

શું છે પાત્રા ચાલ કૌભાંડનો મામલો

 ED અનુસાર ગુરુ આશિષ કન્સ્ટ્રક્શનને પાત્રા ચાલના પુનઃવિકાસનું કામ સોંપવામાં આવ્યું હતું. આ કામ તેમને મ્હાડા દ્વારા સોંપવામાં આવ્યું હતું. તેના અંતર્ગત મુંબઈના ગોરેગાંવમાં 47 એકર જમીન પર પત્રા ચાલમાં 672 ભાડૂતોના મકાનો રિડેવલપ કરવાના હતા.

EDના મતે ગુરુ આશિષ કન્સ્ટ્રક્શને મ્હાડાને ગેરમાર્ગે દોર્યું અને ફ્લેટ બનાવ્યા વિના આ જમીન 9 બિલ્ડરોને 901.79 કરોડ રૂપિયામાં વેચી દીધી. બાદમાં ગુરુ આશિષ કન્સ્ટ્રક્શને મીડોઝ નામનો પ્રોજેક્ટ શરૂ કર્યો અને ઘર ખરીદનારાઓ પાસેથી ફ્લેટ માટે રૂ.138 કરોડ એકત્ર કર્યા.

તપાસમાં બહાર આવ્યું છે કે કન્સ્ટ્રક્શન કંપનીએ ગેરકાયદેસર રીતે રૂ. 1,034.79 કરોડથી વધુની કમાણી કરી હતી. બાદમાં તેણે આ રકમ ગેરકાયદેસર રીતે તેના સહયોગીઓને ટ્રાન્સફર કરી હતી.

ED અનુસાર ગુરુ આશિષ કન્સ્ટ્રક્શન પ્રાઇવેટ લિમિટેડ હાઉસિંગ ડેવલપમેન્ટ એન્ડ ઇન્ફ્રાસ્ટ્રક્ચર લિમિટેડ (HDIL) ની સિસ્ટર કંપની છે. તપાસમાં સામે આવ્યું છે કે HDILએ પ્રવીણ રાઉતના ખાતામાં લગભગ 100 કરોડ રૂપિયા જમા કરાવ્યા હતા.

2010માં પ્રવીણ રાઉતની પત્ની માધુરીએ સંજય રાઉતની પત્ની વર્ષા રાઉતના ખાતામાં 83 લાખ રૂપિયા ટ્રાન્સફર કર્યા હતા. આ રકમથી વર્ષા રાઉતે દાદરમાં ફ્લેટ ખરીદ્યો હતો. EDની તપાસ શરૂ થયા બાદ વર્ષા રાઉતે માધુરી રાઉતના ખાતામાં 55 લાખ રૂપિયા મોકલ્યા હતા.

ED અનુસાર, પ્રવીણ રાઉતે રાકેશ વાધવાન અને સારંગ વાધવન સાથે મળીને હજાર કરોડ રૂપિયાથી વધુની ગેરરીતિ કરી છે.

EDએ પ્રવીણ રાઉત અને તેના નજીકના સહયોગી સુજીત પાટકરના પ્રિમાઈસીસ પર દરોડા પાડ્યા હતા. પ્રવીણ રાઉત અને સંજય રાઉત કથિત રીતે મિત્રો છે. સાથે જ સુજીત પાટકર પણ સંજય રાઉતના નજીકના માનવામાં આવે છે. સુજીત પાટકર પણ સંજય રાઉતની પુત્રી સાથે વાઈન ટ્રેડિંગ કંપનીમાં ભાગીદાર છે.