નવીન જિંદાલને કન્હૈયા લાલની જેમ જાનથી મારી નાખવાની મળી ધમકી

• ભાજપમાંથી હાકી કઢાયેલા નવીન જિંદાલને મળી ધમકી
• ઇ-મેલ દ્વારા આપવામાં આવી ધમકી
• ગળુ કાપી હત્યા કરવાની વાત કરવામાં આવી

નુપૂર શર્માની પયગંબર મોહમ્મદ પર વિવાદાસ્પદ ટિપ્પણી બાદ ભારતીય જનતા પાર્ટીમાંથી હાંકી કાઢવામાં આવેલા નવીન જિંદાલે પોલીસને જાનથી મારી નાખવાની ધમકીઓ મળવાની ફરિયાદ કરી છે. તેમણે ટ્વીટ કરીને કહ્યું કે મેં આ અંગે પીસીઆરને જાણ કરી છે અને ડીસીપી પૂર્વ દિલ્હી, સાયબર સેલ અને દિલ્હી પોલીસ કમિશનરને આ અંગે તાત્કાલિક નોંધ લેવા જણાવ્યું છે.

નવીન જિંદાલને આ ધમકી ઇ-મેલ દ્વારા આપવામાં આવી છે. તેણે સવારે ટ્વીટ કરીને કહ્યું કે આજે સવારે લગભગ 6:43 વાગ્યે મને 3 ઈ-મેલ મળ્યા છે, જેમાં ઉદયપુરમાં ભાઈ કન્હૈયા લાલનું ગળું કાપી નાખવાનો વીડિયો જોડવામાં આવ્યો છે, મારી ગરદન અને મારા પરિવારને પણ કાપી નાખવાની ધમકી આપવામાં આવી છે. મેં પીસીઆરને જાણ કરી છે.

ઉદયપુર દરજી હત્યાકાંડ: NIA કરશે તપાસ, આરોપીઓના આતંકવાદી કનેક્શનની આશંકા

ઉલેમા-એ-હિંદે કન્હૈયાની હત્યાની ટીકા કરી

અહીં જમીયત ઉલેમા-એ-હિંદે ઉદયપુરની ઘટનાની સખત નિંદા કરી છે. મૌલાના હકીમુદ્દીન કાસમીએ કહ્યું છે કે, "જેણે પણ આ ઘટનાને અંજામ આપ્યો છે તેને કોઈપણ રીતે ન્યાયી ઠેરવી શકાય નહીં, તે દેશના કાયદા અને આપણા ધર્મની વિરુદ્ધ છે."

રાજસ્થાનના ઉદયપુરના ધનમંડી પોલીસ સ્ટેશન વિસ્તારમાં દરજી કન્હૈયાની હત્યા કરવામાં આવી હતી. મંગળવારે તેનું ગળું કાપીને ક્રૂરતાપૂર્વક હત્યા કરવામાં આવી હતી. પોલીસે બંને આરોપીઓની ધરપકડ કરી છે. આ સાથે શાંતિની અપીલ સતત કરવામાં આવી રહી છે. ઘટના બાદ ઉદયપુરના સાત પોલીસ સ્ટેશન વિસ્તારમાં રાત્રે આઠ વાગ્યા સુધી આગામી આદેશ સુધી કર્ફ્યુ લાદી દેવામાં આવ્યો છે અને મુખ્યમંત્રી અશોક ગેહલોતે લોકોને શાંતિ જાળવવા અપીલ કરી છે.

ઉદયપુરની ઘટનાનો વીડિયો પ્રસારિત કરવા પર પ્રતિબંધ

મુખ્ય સચિવે તમામ ડિવિઝનલ કમિશનરોને આદેશ આપ્યો છે કે તેઓ મોબાઈલ અને અન્ય માધ્યમો દ્વારા ઉદયપુરની ઘટનાનો વીડિયો પ્રસારિત થતો અટકાવે, સાથે સાથે એ સુનિશ્ચિત કરે કે વીડિયો પ્રસારિત કરનારા લોકો સામે નિયમો અનુસાર કાર્યવાહી કરવામાં આવે. કેન્દ્ર મંગળવારે ઉદયપુરમાં એક દરજીની ઘાતકી હત્યાને આતંકવાદી હુમલા તરીકે ગણી રહ્યું છે અને આતંકવાદ વિરોધી એજન્સી NIAના અધિકારીઓની બનેલી તપાસ ટીમ મોકલી છે કારણ કે પ્રારંભિક માહિતી સૂચવે છે કે હુમલાખોરો ISIS સાથે સંબંધ ધરાવે છે. અધિકારીઓ દ્વારા આ માહિતી આપવામાં આવી હતી.